Економија
ПРОМЕНИТЕ ДОАЃААТ...
Дарко Булдиоски
@darko156 newmedia.mk
Оваа пролет ќе биде исклучително интересна за сите оние кои целосно се потпираа на Фејсбук.
Периодов има една неизбежна тема за која зборуваат сите, и кога велам сите не мислам само на сите луѓе од маркетингот, туку на сите оние кои на каков било начин настрана од приватна употреба користат Фејсбук. Она што веќе се очекуваше, а за што пишував подетално во минатиот свој текст во истиов овој магазин конечно стана јавно. Фејсбук ја најави конечната смрт на органскиот досег на бизнис-страниците. Верувам дека досега ви прелетале преку екран повеќе текстови во кои се толкуваат изјавите на челниците на оваа компанија. Ние веќе започнавме да експериментираме со цел да видиме како ќе се одразат овие промени на работата, но како и што најави Фејсбук, рано е. Промените ќе доаѓаат дел по дел во текот на следниве неколку месеци.
Толку за оваа тема, искрено, немам баш многу што да додадам ново по минатиот текст, а и верувам дека сега за сега сѐ што се пишува е само констатирање на она што ќе доаѓа и претпоставки како да се соочиме со промените. Една работа која ја постави Фејсбук на маса е терминот минингфул конверзејшнс (meaningful conversations). Ова, според нив, значи дека приоритет ќе имаат објавите каде што има повеќе коментари и подолги развиени дискусии. Сега за сега единствен индикатор за овој (нов) сегмент како што се дискутира се бројот и должината на коментарите кои ќе играат поголема улога на сметка на лајковите и споделувањата.
Секако вистинската промена е слична на онаа која пред години Гугл ја предизвика кога неофицијално беше прогласена смртта на оптимизацијата за пребарувачи. Мислам на фактот дека старите тактики за подобрување на позицијата на резултатите на Гугл пребарувањата веќе не беа релевантни. Тогаш Гугл рече: вие само работете си ја работата квалитетно за вашите корисници/потрошувачи, а јас ќе ве рангирам соодветно, што во суштина значеше дека SEO (оптимизација за пребарувачи) од вертикала прејде во хоризонтала во рамките на компаниските структури и се втопи во повеќе различни активности, пред сѐ маркетингот. Слично на тоа сега Фејсбук нѐ тера да се фокусираме на суштината... секако и да одвоиме поголем буџет кој ќе треба да го потрошиме кај нив за да видат нашите фанови што правиме. :)
Рака на срце, на почеток мислевме дека ова е лоша вест, но како што одминува времето сѐ повеќе сметаме дека е добра, всушност ќе ги натера брендовите да се фокусираат повеќе на позначајните бројки во нивната работа, односно остварување на бизнис-целите.
Реков доста е на темава, а никако да престанам да пишувам за неа. Доста е. Ќе го искористам преостанатиот дел од овие страници да отворам една тема, односно сегмент од социјалните медиуми кој ни е многу повеќе скриен од она што се случува јавно на нашите бизнис-страници. Станува збор за т.н. дарк соушл (dark social) дел од комуникацијата што, всушност, ги подразбира сите конверзации и дискусии кои се случуваат во приватните канали на различните сервиси. Да, зборуваме за четови, за мејлови, за групи и за приватни пораки. Дигиталните маркетери многу добро знаат или би требало да знаат дека голем дел од дискусијата за нивните брендови се случува зад затворени врати и дека исклучително предизвикувачки е да се дознае што се случува таму.
Веројатно фактот кој вели дека Фејсбук со оваа промена сака да ги инспирира повеќе крајните корисници да бидат поактивни јавно укажува на енормно зголемената активност на овој „скриен“ дел од комуникацијата.
Кој доаѓа на нашиот сајт или други канали? Од каде дошле? Како слушнале за нас? И, клучно, како можеме да ги оправдаме оние 90 % од буџетот кои одат на јавните платформи и покрај тоа што знаеме дека 84 % од споделувањата на социјалните медиуми се случува зад овие затворени врати?
Често овие дискусии и треба да останат приватни, но во исто време предизвик е да се воспостават практики кои во одредена ситуација ќе ни помогнат да разбереме како нашите корисници ги носат своите одлуки. Токму затоа голем број компании веќе некое време се обидуваат преку различни активности и анкети да ги детектираат што е можно подетално однесувањата на своите корисници сѐ со цел подобрување на својата комуникација и понуда. Некои експериментираат со чет-ботови и така влегуваат во „тајниот“ простор на своите корисници, некои користат линкови за споделувања кои имаат можност да следат повеќе, а некои во своите останати активности вклучуваат анкети и слични интерактивни алатки преку кои добиваат конкретни информации.
Како и да е, како маркетери мораме да го прифатиме дарк соушл (dark social) и да бидеме свесни за неговата моќ и влијание, но никако да не се обидуваме по секоја цена да го нарушиме тој приватен простор на корисниците затоа што сѐ што можеме да очекуваме назад е да ја напуштат таа комуникација или сервис и да се скријат на друго место. Како и да е, секогаш можеме да ги прашаме луѓето што мислат или што чувствуваат за нашите активности... Ако сме заслужиле, ќе добиеме искрени одговори... А за да заслужиме треба да бидеме релевантни, транспарентни и постојани...