Економија
КИНА СО АМБИЦИОЗНA ЦЕЛ ЗА РАСТ И ПОКРАЈ ЦАРИНСКАТА ВОЈНА СО САД
05.03.2025
Кина објави амбициозна цел за раст на БДП од „околу 5 проценти“ за 2025 година и покрај забавувањето на домашната економија и зголемените трговски тензии со САД.
Бројката, која одговара на целите на Пекинг за претходните две години, беше објавена во годишниот „работен извештај“ на владата, што претставува преглед на нејзините достигнувања во изминатата година и економските цели и политики за 2025 година.
Бројката за раст, која беше во согласност со очекувањата на пазарот, ја сигнализираше решеноста на Пекинг да го задржи растот во услови на обновени трговски непријателства со САД, кои воведоа дополнителни царини за Кина оваа недела.
Но, некои аналитичари велат дека мерките за фискално трошење објавени во извештајот не ги исполниле очекувањата на пазарот, бидејќи повеќегодишната криза со недвижностите продолжува да влијае на домашната потрошувачка.
Целта од 5 проценти беше неопходна „за да се стабилизира вработеноста, да се спречат ризиците и да се подобри благосостојбата на луѓето“, како и да се исполнат „долгорочните развојни цели“, изјавија од кинеската влада, пренесува „Сеебиз“.
фото freepic