Економија
Што очекувате во 2019 година? Драгољуб Арсовски: ОЧЕКУВАМЕ ВИСОКАТА СТАПКА НА РАСТ НА КРЕДИТИРАЊЕТО ОД 2018 ГОДИНА ДА ПРОДОЛЖИ И НАРЕДНАВА ГОДИНА
Драгољуб Арсовски
претседател на Управниот одбор на ТТК Банка АД Скопје
Во 2019 година ТТК Банка ќе продолжи да дејствува проактивно фокусирајќи се кон стабилно и профитабилно оперативно работење врз основа на реални очекувања. Очекуваме високата стапка на раст на кредитирањето од 2018 година да продолжи и нареднава година. Понудата на производите ќе се базира на атрактивни, конкурентни и поволни услови. Со оглед на окружувањето и релативно ниските каматни стапки, контролата на трошоците и квалитетот на пласманите и понатаму ќе бидат од клучна важност. Одржувањето ниска стапка на ненаплатливи кредити како еден од поизразените трендови ќе се остварува и во иднина преку ефикасно дејствување, продажбата на ненаплатливите кредити, подобрата наплата и очекувањата за економска стабилизација. Потпирањето на сопствените извори на финансирање како основа на деловната стратегија претставува поттик за понуда на атрактивни штедни производи за физички лица. Извесна е достапноста на средства и од европските фондови, што ќе претставува можност за поголем пристап до атрактивни банкарски производи за компаниите. Континуираното иновирање и развојот на дигиталното банкарство, подобрувањето на квалитетот на услугата и искуството на корисниците останува императив со фокус на унапредување на продуктивноста.