Економија
Мојсоска Блажевски: За жал, преовладуваат очекувањата дека економијата ќе каска и ќе остане во сенка на политичките случувања во земјава и меѓународно
Што очекувате од 2022 година?
Никица Мојсоска Блажевски, извршен директор на Македонија2025
Досега, во моите пишанија за очекувањата за следната година, се обидував да најдам рамнотежа меѓу предизвиците (или негативните очекувања и движења) и она што мислам дека е на добар пат или позитивно. Овој пат, за жал, преовладуваат очекувањата дека економијата ќе каска и ќе остане во сенка на политичките случувања во земјава и меѓународно. Меѓународните случувања (очекувањата за започнување на преговори за членство во ЕУ) се толку силни што сметам дека ги потиснуваат и ги заматуваат економските движења и аспирациите за повисок животен стандард, реформи кон подобрување на деловното окружување итн. И домашната политика и економијата станаа заложници на „датумот за започнување на преговори“. Мора да ја смениме стратегијата на овој план, инаку нема да има економски и општествен напредок.
За жал, силни се и економските предизвици, пред сè енергетската криза и цената на енергијата, како и инфлацијата. На позитивната страна би ја ставила фискалната политика и плановите за поголема фискална отчетност на општините. Но, да видиме какви решенија ќе понуди новата влада.